العناية بالنعناع

النعناع انتعاش ولما يكون اخضر فريش من على عتبة سطحك ولا بلكونتك ...بيكون حماده تاني خالص
ناس كتير نفسها تزرع النعناع ودايما نلاقي شكاوى ان النعناع بيموت منهم
برغم اننا عملنا 3 فيديوهات عن النعناع
وعملنا تقريبا 3 بوستات مكتوبة عن النعناع
لكن الموضوع لسه برده عاوز شرح وتوضيح واحنا معاكو لحد ما تنجحو ان شاء الله
ولذلك قررنا الآتي:
هنكتب خلاصة كل المواضيع اللى عملناها في البوست ده وبعدين هنحول البوست ده لفيديو عشان النصائح تكون واضحة
#النصائح_اللولبية_لنبتة_نعناع_قوية
=====================
هنعرف الاول ان طبيعة نمو النعناع ...ما هو اللى بيحب حاجه لازم يعرف عنها كل حاجه عشان يعرف ازاى يتعامل معاها
اول حاجه تعرفها عن النعناع ان الجذر بتاعه بيمد جوه التربة بالعرض مش لاسفل ...ده يعني ان لو زرعت في حاجه غويطة الجذر هيلف ويعمل حلزونة ...حلزونة !!!...اه والله زمبؤلك كده
هتلاقوا صورة الحلزونة في الصورة المرفقة بالبوست
-
الوعاء المناسب:
طيب كده النعناع عاوز وعاء واسع عمقه 30 سم بالكتير كل ما كان واسع كل ما كان احسن ... فتحات الصرف ...فتحات الصرف...فتحات الصرف وياريت تكون الفتحه في سمك القلم الرصاص لو سمحتم مش ثقب ابرة الله يباركلكم.
-
تاني معلومة نعرفها عن النعناع انه نبات ورقي بمعني ايه نبات ورقي ...ده بمعنى ان الجزء المستهلك منه هو الاوراق ...طيب انا هستفاد ايه من المعلومة دي يعني اقولك انا هتستفاد ايه..
التربة المناسبة:
وده لانه نبات ورقي وجذرة بيمد فهو بيحب التربة تكون طينية وجيدة الصرف ...يعني مثلا هتزرع في طين + كمبوست+ بيتموس هيكون كويس جدا جدا للنعناع اي اسئله عن مخاليط التربة اتفضلوا اسئلوا عنها على حسب المتوفر عندكوا
-
المكان وضوء المكان:
النعناع نبات عطري الجزء المستهلك منه ورق ...مش نبات زينة داخلى ورقي هاااااا ... يعني حضرتك ارميه في الشمس تنقع فيه عشان الورق يعمل بناء ضوئي ويشتغل
مش تروح تحطه ورا الشباك وتقولى ضوء مباشر واصله في منور ولا تحطه في البلكونة الغربية  من البيت.
اقل ساعات ضوء شمس 6 ساعات ممنوع مناور الا اذا كان بيدخلها شمس
-
التغذية:
النعناع بيحب النيتروجين والحديد والبوتاسيوم زي عنيه وخصوصا النيتروجين واحنا هنلاقي النيتروجين فين
ده هتلاقيه في الكمبوست
هتلاقيه في القهوة
هتلاقي في NPK
-
الري:
النعناع نبات محب للماء لازم يعني انتظام عملية الري بدون افراط وتغريق ولا تعطيش ...اروي في الصيف كل يوم بمعدل ربع لتر لاصيص 3 لتر واخدين بالكو ؟؟ لو هتغرق وتروي لحد ما الاصيص كله يشرب هتستنا يومين وتروي التالت
-
نعناع يدبل ويموت ازرعه معرفش بيحصله ايه
اه النعناع ده معطاء وكريم كل ما تقصه وتاخد منه يديك .. كل  ما تشيل القمة النامية يفرع ويكتر ويملا المكان اللى مزروع فيه عشان كده لازم متسبش الورقه تكبر اوي عشان طعمها ميمررش وعشان النبات ميصفرش ويموت شوفوا الفيديو ده
https://www.youtube.com/watch?v=9r7E0C9AMFg

ده انت ممكن تتحول لموزع نعناع اصلا من الموضوع ده من كتر ما هيكبر منك هتكون عاوز تاخد منه وتزرع في مكان تاني ..وتهادي الحبايب والاقارب والجيران والاصدقاء
-
يافندم...نعم... فين طريقة الزراعة هو انتوا دخلتوا في العناية قبل ما تقولوا طريقة الزراعة
اايووون طبعا لان كلكوا هتقروا طريقة الزراعة وتطلعوا تجروا
كمل البوست للاخر يا برنس/يسة عشان تعرفوا  طريقة الزراعة
-
النعناع ده بيزرع طول السنة ما عدا وقت البرد من السنة وعادة افضل معاد لاكثاره هو بدايه مارس.
-
ايوة عشان كده النبات مات مني في الشتاء ؟؟
لا لا تعالى هنا...مين ده اللى مات؟ ...النعناع؟! ...لا ممتش طبعا انت ممكن تلاقي النبات نشف منك وعوده كمان جف واتحول لبني وتروحوا حضراتكو زي الشاطرين رميين الاصيص
النعناع بيستريح شويه ودخل في حاجه اسمها سكون زي البيات الشتوي كده في الحشرات زي النحل والنمل ... وانتو بسلامتكو عاوزين سوبر هيرو نعناع يشتغل صيف وشتاء وربيع وخريف ...الراجل بيوفر طاقته عشان يحمي نفسه من البرد معلش اصبر   هيشتغل تاني معاكو اول ما الجو يدفي البوست ده عن موضوع البرد
https://www.facebook.com/agriroof/photos/a.1174268099307753.1073741828.1174188769315686/1258014924266403/?type=3&theater
-
الطريقة الشائعه لزراعة النعناع هي انك تشوف نوع نعناع بتحبه وتقرر تاخد جذر نعناع من عند اي بياع خضار سهل جدا وهتلاقيه اسئلهم بس وهما هيدولك ده فيديو بيوضح الطريقة
https://www.youtube.com/watch?v=Qy1B9bLKJ0M&t=53s

الطريقة التانية هي انك بعد ما تشتري النعناع بتاخد الفروع بعد ما تشيل الورق من عليها وتسيب ورقتين على قمه كل فرع وتحطهم في ميه لحد ما يجذروا ... خد اكتر فروع ممكنه لان مش كل الفروع هتعمل جذور اللى هينجح معاك انقله لاصيص وهيكبر ويكتر معاك .

#بيتك_جنة_خضرا